Bevry

Vryheid
709 woorde

Hierdie ses tronkselle is leeg.  Hier is ses dinge wat die Bybel duidelik leer waarvan Jesus ons bevry het: 

Jou denke is bevry
"Ek vermaan julle dan, broeders, by die ontferminge van God, dat julle jul liggame stel as 'n lewende, heilige en aan God welgevallige offer.  Dit is julle redelike godsdiens.  En word nie aan hierdie wereld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevalige en volmaakte wil van God is' (Romeine 12:1-2).

Jy is van ongeloof bevry
"Die geloof dan is 'n vaste vertroue op die dinge wat ons hoop, 'n bewys van die dinge wat ons nie sien nie.  Want daardeur het die mense van die ou tyd getuienis ontvang" (Hebreers 11:1-2).  

Jesus het jou van siekte en sonde bevry
"Loof die HERE, o my siel, en vergeet geeneen van sy weldade nie!  Wat al jou ongeregtigheid vergewe, wat al jou krankhede genees, wat jou lewe verlos van die verderf, wat jou kroon met goedertierenheid en barmhartighede, wat jou siel versadig met die goeie, sodat jou jeug weer nuut word soos die van 'n arend" (Psalm 103:2-5).

"... Hy tog het soos 'n loot voor sy aangesig opgespruit en soos 'n wortel uit droe groed.  Hy het geen gestalte of heerlikheid gehad, dat ons Hom sou aansien nie, en geen voorkoms, dat ons Hom sou begeer nie.  Hy was verag en deur die mense verlaat, 'n man van smarte en bekend met krankheid; ja, soos een die wie 'n mens sy gelaat verberg; Hy was verag en ons het Hom nie geag nie.  Nogtans het Hy ons krankhede op Hom geneem, en ons smarte - die het Hy gedra; maar ons het Hom gehou vir een wat geplaag, deur God geslaan en verdruk was.  Maar Hy is ter wille van ons oortredinge deurboor, ter wille van ons ongeregtighede is Hy verbrysel: die straf wat vir ons die vrede aanbring, was op Hom, en deur sy wonde het daar vir ons genesing gekom"  (Jesaja 53:2-5).

En Petrus (1 Petrus 2:24) sluit by Jesaja se uitspraak aan wanneer hy daarop wys dat Jesus  "... self ons sondes in sy liggaam op die kruishout gedra het, sodat ons die sondes kan afsterwe en vir die geregtigheid lewe; deur wie se wonde julle genees is".

Jesus het jou van die ewige dood vrygemaak 
"Net soos Moses die slang in die woestyn verhoog het, so moet die Seun van die mens verhoog word, sodat elkeen wat in Hom glo nie verlore mag gaan nie, maar die ewige lewe kan he.  Want so lief het God die wereld gehad, dat Hy sy eniggebore Seun gegee het, doat elkeen wat in Hom glo, nie verlore mag gaan nie, maar die ewige lewe kan he.  Want God het sy Seun in die wereld gestuur nie om die wereld te veroordeel nie, maar dat die werekd deur Hom gered kan word.  Hy wat in Hom glo, word nie veroordeel nie; maar hy wat nie glo nie, is alreeds veroordeel omdat Hy nie geglo het in die Naam van die eniggebore Seun van God nie" (Johannes 3:14-18).

Kortweg?
Vernuwe jou denke so:  
geloof bewys wat jy nog nie kan sien nie; dws
geloof is die bewys dat Jesus jou krankhede gedra het (jy hoef dus nie siekte te verdra nie), 
geloof is die bewys dat  Hy jou sonde op Hom geneem het (jy word dus nie meer daarvoor gestraf nie en jy hoef nie meer sonde te doen nie), 
geloof is die bewys Hy jou vrygemaak het van die komende ewige dood.  

Dis bevryding!  Dis ook wat dit beteken om gered te wees: dit beteken jy is van hierdie dinge gered (ongeloof, verkeerde denke, siekte, sonde, en die ewige dood).

Selfondersoek

Selfondersoek

857 woorde

Hy wat sê dat hy in Hom bly, behoort self ook so te wandel soos Hy gewandel het (1 Johannes 2:6). Maar soos Hy wat julle geroep het, heilig is, moet julle ook in jul hele lewenswandel heilig word, omdat daar geskrywe is: Wees heilig, want Ek is heilig (1 Petrus 1:15-16). Verneder julle dan onder die kragtige hand van God, sodat Hy julle kan verhoog op die regte tyd. Werp al julle bekommernis op Hom, want Hy sorg vir julle (1 Petrus 5:6-7). julle voor die Here, en Hy sal julle verhoog (Jakobus 4:10).

Elkeen van ons moet die naaste behaag met die oog op wat goed is tot stigting (Romeine 15:2).

Julle moet nie elkeen na sy eie belange omsien nie, maar elkeen ook na die ander s’n (Filippense 2:4). Vergeet die weldadigheid en mededeelsaamheid nie, want God het ‘n welbehae aan sulke offers (Hebreërs 13:16). Julle moet ook geduldig wees; versterk julle harte, want die wederkoms van die Here is naby (Jakobus 5:8). Julle moet almal eer, die broederskap liefhê, God vrees, die koning eer (1 Petrus 2:17).

Daarom, geliefdes, terwyl julle hierdie dinge verwag, beywer julle dat julle vlekkeloos en onberispelik voor Hom bevind mag word in vrede (1 Petrus 3:14). Maar julle, geliefdes, moet julleself opbou in jul allerheiligste geloof en in die Heilige Gees bid en julleself in die liefde van God bewaar, terwyl julle die barmhartigheid van onse Here Jesus Christus tot die ewige lewe verwag (Judas 20-21). Wees aan niemand iets skuldig nie, behalwe om mekaar lief te hê; want hy wat ‘n ander liefhet, het die wet vervul (Romeine 13:8).

As julle in gehoorsaamheid aan die waarheid julle siele deur die Gees tot ongeveinsde broederliefde gereinig het, moet julle mekaar vurig liefhê uit ‘n rein hart (1 Petrus 1:22). Laat jou nie deur die kwaad oorwin nie, maar oorwin die kwaad deur die goeie (Romeine 12:21). En eindelik, wees almal eensgesind, medelydend, vol broederliefde en ontferming, vriendelik (1 Petrus 3:8).

Ek vermaan julle dan, ek, die gevangene in die Here, om te wandel waardig die roeping waarmee julle geroep is, met alle nederigheid en sagmoedigheid, met lankmoedigheid, terwyl julle mekaar in liefde verdra (Efesiërs 4:1-2).

Volhard in die gebed en waak daarin met danksegging. Wandel in wysheid teenoor die wat buite is, en koop die tyd uit. Laat julle woord altyd aangenaam wees, met sout besprinkel, sodat julle kan weet hoe julle iedereen moet antwoord (Kolpssense 4:2-6). Doen alles sonder murmurering en teëspraak, sodat julle onberispelik en opreg kan wees, kinders van God sonder gebrek te midde van ‘n krom en verdraaide geslag onder wie julle skyn soos ligte in die wêreld, deurdat julle die woord van die lewe vashou, my tot ‘n roem teen die dag van Christus, dat ek nie verniet geloop of verniet gearbei het nie (Filippense 2:14-16).

Bedink wat goed is nie alleen voor die Here nie, maar ook voor die mense (2 Korinthiërs 8:21). Bedink die dinge wat daarbo is, nie wat op die aarde is nie (Kolossense 3:2).

Wees altyddeur bly. Bid sonder ophou. Wees in alles dankbaar, want dit is die wil van God in Christus Jesus oor julle. Blus die Gees nie uit nie. Verag die profesieë nie. Beproef alle dinge; behou die goeie. Onthou julle van elke vorm van kwaad (1 Tesalonissense 5:16-21).

Maar jy, man van God, vlug van hierdie dinge weg, en jaag ná die geregtigheid, godsaligheid, geloof, liefde, lydsaamheid, sagmoedigheid. Stry die goeie stryd van die geloof, gryp na die ewige lewe, waartoe jy ook geroep is en die goeie belydenis voor baie getuies afgelê het. Ek gebied jou voor die aangesig van God wat aan alle dinge die lewe gee, en van Christus Jesus wat voor Pontius Pilatus die goeie belydenis betuig het, dat jy die gebod onbevlek, onberisplik bewaar tot by die verskyning van onse Here Jesus Christus (1 Timoteus 6:11-14).

Laat die liefde ongeveins wees; verafsku wat sleg is; hang die goeie aan; wees hartlik teenoor mekaar met broederlike liefde; die een moet die ander voorgaan in eerbetoning; wees nie traag in die ywer nie; wees vurig van gees; dien die Here; verbly julle in die hoop; wees geduldig in die verdrukking; volhard in die gebed, wees bly met die wat bly is, en ween met die wat ween (Romeine 12:9-15). Maar wees vriendelik en vol ontferming teenoor mekaar; vergeef mekaar soos God ook in Christus julle vergewe het (Efesiërs 4:32).

Spreek onder mekaar met psalms en lofsange en geestelike liedere; en sing en

psalmsing in julle hart tot eer van die Here, terwyl julle God die Vader altyd vir alles dank in die Naam van onse Here Jesus Christus (Efesiërs 5:19-20).

Daarom, my geliefdes, soos julle altyd gehoorsaam gewees het, nie in my teenwoordigheid alleen nie, maar baie meer nou in my afwesigheid, werk julle eie heil uit met vrees en bewing (Filippense 2:12).

Maar bo alles, my broeders, moenie sweer nie: nie by die hemel nie, ook nie by die aarde nie en ook geen ander eed nie; maar laat julle ja ja wees en julle nee nee, sodat julle nie onder ‘n oordeel val nie (Jakobus 5:12).

Twee dae gelede

Twee dae gelede
932 woorde

Een-en-twintig eeue gelede het die byeenkomste van gelowiges aansienlik verskil van hoe dit nou gaan. 

In die Bybel is daar twee gemeentes se byeenkomste waaruit ons kan leer oor hoe die eerste volgelinge van Jesus hulle byeenkomste ingerig het. Die manier hoe ons kerklike byeenkomste vandag inrig kom nie ooreen met wat oor die byeenkomste van die twee gemeentes in die NT geskryf staan nie.

Vandag se tyd doen ons dit gewoonlik so:

Ons kom in groot geboue bymekaar.  In groot getalle.    Die orkes of orrel maak gewyde musiek.  Die prediker laat die aanbiddingspan die sang lei.  Die predikant preek.  Hy bid. Soms word daar geleentheid gemaak vir 'n paar om te getuig oor die goedheid van God vir hulle.  Kollekte word opgeneem.  Soms in die banke en ook by die deure (wanneer daar geld gevra word vir 'n spesiale projek). Dan gaan almal huis toe.  Die res van die week is daar dalk 'n Bybelstudie of 'n biduur (of albei) Woensdagaand.  En soms is daar vergaderings van die kerkraad vier keer of twaalf keer per jaar.  Die Finansiele Kommissie vergader natuurlik ook op gereelde grondslag sekere weeksaande.  Dieselfde geld vir die Vroue-aksie en die Jeugaksie - en baie soortgelyke aktiwiteite.  Sommige gemeentes hou soms evangelisasie-uitreikaksies waarby al die lidmate veronderstel is om aan deel te neem.  Gemeentefunksies (basaar) is aan die orde van die dag.  Deesdae gebeur dit ook dat gemeentes op hulle kerkgebou se perseel 'n privaat (Christelike) skool begin.

Niks van die dinge wat sulke gemeentes vandag doen, word in die boek Handelinge beskryf nie.

Handelinge 2:42-47) reken die eerste gelowiges het anders gedoen. 

Hier is wat die rekord aandui hulle gedoen het:  Hulle het naamlik volhard in wat die apostels geleer het. Hulle het volhard in die gemeenskap, in die breking van die brood en in die gebede.  Die apostels het baie wonders en tekens gedoen.  Al die gelowiges was bymekaar.  Hulle het alles gemeenskaplik besit.  Hulle het hulle eiendomme en besittings verkoop en die opbrengs onder mekaar verdeel volgens wat elkeen nodig gehad het. Hulle het dag vir dag eendragtig bymekaargekom in die tempel. Hulle het daagliks van huis-tot-huis brood gebreek, hulle voedsel met blydskap en eenvoud van hart geniet.  Hulle het God geprys.  

Die resultaat van hulle lewenswyse was dit:  hulle was in guns by die hele volk, en die Here het daagliks by die gemeente gevoeg die wat gered is (Handelinge 2:47).  

Niks van wat ons by gereelde kerlike byeenkomste doen, word ook nie in 1 Korinthiers 14 (26-40) vermeld nie.  

En hier het ons nogal iets wat soos voorskrifte vir die byeenkomste klink,  In Handelinge - dit moet mens toegee - is daar nie opdragte dat dit is hoe die volgelinge van Jesus moet lewe nie.  Dit word bloot gestel as die feite van hoe hulle hulleself gedra het en wat hulle gedoen het.  Hier - in Korinthiers - is die woordkeuse van die Skrif egter duidelik meer soos instruksies.  Dit word selfs  'bevele van die Here'  genoem (maar ons doen dit nie tydens ons byeenkomste nie)... 

Lees bietjie weer:

Elkeen het 'n psalm of 'n lering of 'n taal of 'n openbaring of 'n uitleg.  Elkeen.  Nie net die prediker nie.  Alles het stigtelik verloop.  Twee of drie anderstaliges is toegelaat om te praat - indien daar ander teenwoordig was wat daardie taal verstaan en vir almal kon vertaal. Twee of drie profete het aan die woord gekom.  Al die ander wat teenwoordig was, moes hulle 'toesprake' beoordeel.  Terwyl een aan die woord was, en iemand ontvang 'n openbaring, moet die spreker eers swyg en die een wat die openbaring ontvang het, voorkeur kry om te praat.  Nietemin - elkeen kan een vir een 'n beurt kry om te profeteer - sodat almal kan leer en almal bemoedig kan word.  Nie net een prater nie.  Die vroue moet swyg in die byeenkoms.  Hulle mans moet hulle vrae tuis beantwoord.  In vers 37 staan daar:  "As iemand meen dat hy 'n profeet of 'n geestelike mens is, moet hy erken dat wat ek aan julle skrywe, bevele van die Here is".

Die verskille is aansienlik...  

Toe het almal deelgeneem. Nou is dit hoofsaaklik die prediker en die aanbiddingspan wat voorgaan.  Toe was dit in huise (nadat hulle uit die tempel verban is), nou is dit in groot geboue.  Hulle het geen aanbiddingspanne gehad nie.  Ons byeenkomste word omtrent deur hulle oorweldig.  Ons het orkeste en orrels.  Hulle het dit nie gehad nie.  Toe het elkeen 'n spreekbeurt gekry.  Nou kry net die prediker 'n spreekbeurt. Ons het nie meer apostels wat baie wonderwerke doen nie...  Ons kom weekliks bymekaar, nie daagliks nie. Ons breek ook nie daagliks saam brood nie.  Hulle het nie opgeleide predikers in diens gehad soos ons nie.  Ons stuur spesialiste uit om evangelisasie te gaan doen.  Toe het hulle dit nie gedoen nie.  Hulle het nie geldinsamelingsveldtogte geloods nie.  Die mense het vrywilliglik hulle goed verkoop en die opbrengs met mekaar gedeel volgens behoefte. Ons weet lankal nie meer wat eendragtigheid is nie - ons het derduisende denominasies.

Die resultaat van die lewenswyse van vandag se volgelinge van Jesus is omtrent net Sondag sigbaar tydens die byeenkoms - omdat daar 'n byeenkoms plaasvind.  Baie min word daagliks bygevoeg wat gered word. 

Duisend jaar is in die oog van God soos een dag en een dag soos duisend jaar (Psalm 90:4; 2 Petrus 3:8). 

Dis vir my duidelik dat die aard van die byeenkomste, die lewensstyl en die invloed van die gelowiges baie verander het en nou baie afwyk van hoe dit twee dae gelede was...

Nog 35...

Jesus het baie dinge geleer toe Hy hier was. 
515 woorde 

Daar is geleerdes wat reken daar is meer as duisend opdragte of bevele van dinge wat Christene moet doen wat in die Nuwe Testament alleen opgeteken is.  

Na aanleiding van die vorige post, lys ek hier nog vyf-en-dertig vir jou oorweging (Ek gaan nie nog veertig soek nie!):

1   Moenie die Gees van God laster nie (Matteus 15:19-20).
2   Doen goeie dinge op die Sabbatdag (Matteus 12:11-12).
3   Eer jou vader en jou moeder (Matteus 15:4; Markus 10:19).
4   Moenie moord pleeg nie (Matteus 19:18; Lukas 18:20).
5   Moenie owerspel pleeg nie (Matteus 5:27-28; Markus 7:21-23).
6   Moenie steel nie (Matteus 19:18; Markus 10:19).
7   Moenie vals sweer nie (Matteus 5:33-34; Lukas 18:20).
8   Moenie begeer nie (Markus 15:19-20).
9   Wie sonde doen, is 'n slaaf van die sonde (Johannes 8:34).
10 Slegs diegene wat die wil van God doen, erf die koninkryk (Matteus 7:21).
11 Almal wat wetteloos lewe, gaan vuur toe (Matteus 13:40-42).
12 Moenie menslike tradisies bo wetsgehoorsaamheid stel nie (Markus 7:6-9).
13 Onderhou die gebooie en jy sal die ewige lewe erf (Matteus 19:17; Markus 10:17-19).
14 Maak dissipels van al die ander etniese groepe (Matteus 28:18-20).
15 Jeus is met ons wanneer ons dissipels van ander mense maak (Matteus 28:20).
16 As ons Hom HERE noem, moet ons doen wat hy beveel (Lukas 6:46).
17 Jesus se broers is diegene wat God se woord doen (Lukas 6:46).
18 Jy moet God en jou naaste bo alles stel (Matteus 25:37-40).
19 Jy moet ander vergewe op dieselfde wyse as wat God jou vergewe (Matteus 6:12).
20 Moenie ander mense oordeel nie (Matteus 7:1-2).
21 Vergewe ander mense 7X70 keer (Matteus 18:22).
22 Dis moeilik vir rykes om die koninkryk van God te erf (Matteus 19:@4).
23 Soek eerste die koninkryk van God en die nader dinge kom by (Matteus 6:25-33).
24 Werk vir die spyse wat bly tot in ewigheid (Johannes 6:27)
25 Moenie werk vir die spyse wat vergaan nie (Johannes 6:27).
26 Moenie jou bekommer oor wat jy eet of aantrek nie (Matteus 6:25-26).
27 Jy kan nie vir twee base werk nie (Matteus 6:24).
28 Moenie jou perels vir die varke gooi nie (Matteus 7:6).
29 Vra en jy sal ontvang, soek en jy sal vind, kop en die deur sal oopgemaak word (Mat 7:7)
30 Jy kan die koninkryk slegs deur die nou poort binnegaan (Matteus 7:13).
31 As jy glo, kan jy siekes genees en duiwels uitdruf (Markus 16:18).
32 Jy word aan jou vrugte geken (Matteus 7:16).
33 Versoen jou met jou naaste voor jy tot die HERE nader (Matteus 5:23).
34 Jy moet lig en sout vir die wereldlinge wees (Matteus 5:13-14).
35 Jy moet volmaak wees soos God in die hemel volmaak is (Matteus 5:48).

Hierdie twee lysies het my weer onder die indruk gebring van die uitspraak dat ons nie meer leef nie, maar Christus leef deur ons (Galasiers 2:20).  Anders sou nie een van hierdie of die vorige lysie se doendinge iewers op aarde onder mense sigbaar gewees het nie...