Bloedlynvloeke

Bloedlynvloeke                                            788 woorde

In Deuteronomium 5:7-10 staat geskrywe: "Jy mag geen ander gode voor my aangesig hê nie.  Jy mag vir jou geen gesnede beeld of enige gelykenis maak van wat bo in die hemel is, of van wat onder op die aarde is, of van wat in die waters onder die aarde is nie.  Jy mag jou voor hulle nie neerbuig en hulle nie dien nie; want Ek, die HERE jou God, is ‘n jaloerse God wat die misdaad van die vaders besoek aan die kinders, en aan die derde en aan die vierde geslag van die wat My haat; en Ek bewys barmhartigheid aan duisende van die wat My liefhet en my gebooie onderhou."   

Die verbod (geen) in vers 7 is 'n absolute verbod.  In Hebreeus is dit lo (geen; geeneen; nooit).    Geen gesnede beeld maak nie, is eweneens met lo verbied.  Jy mag nie voor hulle neerbuig nie en hulle nie dien nie, is ook albei met die absolute verbod, lo, verbied.  Die rede daarvoor volg: dit is avon (sonde; perversiteit; morele boosheid).   

Indien iemand dit doen, word sodanige oortreding tot in die derde en vierde nageslag met straf deur God opgevolg.

Geleerdes het dit mettertyd benoem as bloedlynvloeke.  

Die boek Deueronomium is volgens die interne verwysings in die boek self, geskryf in 1428 vC.

Sowat 800 jaar later (afgerond) profeteer Jeremia en Esegiel - en wat hulle skryf in hierdie verband, lees soos volg:  "En soos Ek oor hulle wakker was om uit te ruk en om te gooi en te verwoes en te vernietig en skade aan te doen, so sal Ek oor hulle wakker wees om te bou en te plant, spreek die HERE. In dié dae sal hulle nie meer sê nie: Die vaders het groen druiwe geëet, en die tande van die kinders het stomp geword. Maar elkeen sal weens sy eie ongeregtigheid sterwe; elke mens wat die groen druiwe eet, sy tande sal stomp word." (Jeremia 31:28-30). In die boek van Esegiel (18:2-4) - word dieselfde gedagte soos volg beskryf:  "Wat is dit met julle dat julle hierdie spreekwoord gebruik aangaande die land van Israel, naamlik: Die vaders het groen druiwe geëet, en die tande van die kinders het stomp geword? So waar as Ek leef, spreek die Here HERE, dit sal julle nie meer in die gedagte kom om hierdie spreekwoord in Israel te gebruik nie. Kyk, al die siele is myne; soos die siel van die vader, so die siel van die seun—hulle is myne; die siel wat sondig, dié moet sterwe."

Dis duidelik dat albei hierdie profete die sondes van die vaders wat tot aan die vierde nageslag gestraf word, op die uitspraak van die HERE nie meer gehandhaaf het nie.  Die HERE het dit verander - elkeen word (nou) vir (net) sy eie avon gestraf.

Dis leersaam om te lees dat hierdie verandering aangekondig is saam met die aankondiging van die koms van die nuwe verbond (Jeremia 31:31-34):  "Kyk, daar kom dae, spreek die HERE, dat Ek met die huis van Israel en die huis van Juda ‘n nuwe verbond sal sluit; nie soos die verbond wat Ek met hulle vaders gesluit het op dié dag toe Ek hulle hand gegryp het om hulle uit Egipteland uit te lei nie - my verbond wat húlle verbreek het, alhoewel Ék gebieder oor hulle was, spreek die HERE. Maar dit is die verbond wat Ek ná dié dae met die huis van Israel sal sluit, spreek die HERE: Ek gee my wet in hulle binneste en skrywe dit op hulle hart; en Ek sal vir hulle ‘n God wees, en hulle sal vir My ‘n volk wees. En hulle sal nie meer elkeen sy naaste en elkeen sy broer leer nie en sê: Ken die HERE; want hulle sal My almal ken, klein en groot onder hulle, spreek die HERE; want Ek sal hulle ongeregtigheid vergewe en aan hulle sonde nie meer dink nie."

Die koms van die nuwe verbond het die bestaan van bloedynvloeke opgehef.  Daar is nie eers voorbeelde van die breking van bloedlynvloeke in die Ou Testament nie.  In die Nuwe Testament word daar gladnie eers iets oor geskryf nie.  

Dis vir my duidelik God het self die besoeking van tot in die vierde geslag sondes van die vaders (= bloedlynvloeke) opgehef - en elkeen persoonlik aanspreek begin hou vir sy eie avon.  

Daarom is dit vir my onduidelik waarom in ons dag mense nog aandag gee aan iets wat die HERE self opgehef het...  Galasiers 3:13 se kraguitspraak verwoes enige vloek vir enige van sy volgelinge:  "Christus het ons losgekoop van die vloek van die wet deur vir ons ‘n vloek te word—want daar is geskrywe: Vervloek is elkeen wat aan ‘n hout hang..."